ზემო ფონიჭალის 206-ე საჯარო ბაღის დირექტორი „ბაგა-ბაღების მართვის სააგენტომ" თანამდებობიდან გაათავისუფლა. ხვალ სამსახურს დატოვებენ აღმზრდელი და აღმზრდელის თანაშემწეც - ამის შესახებ „ლიბერალს" „ბაგა-ბაღების მართვის სააგენტოს" დირექტორმა თემურ თორდინავამ განუცხადა.
ფონიჭალაში მდებარე 206-ე საბავშვო ბაგა-ბაღში დღეს მეორე სართულიდან ბავშვი გადმოვარდა. სააგენტოში ამბობენ, რომ მონიტორინგის სააგენტოს მოკვლევით, ინციდენტი უყურადღებობამ გამოიწვია.
ჯანდაცვის მინისტრი, დავით სერგეენკო ამბობს, რომ ბავშვს ქალა-ტვინის ტრავმა და გულ-მკერდის ტრავმა აღენიშნება.
„მას აქვს ქალა-ტვინის ტრავმა და გულ-მკერდის ბლაგვი ტრავმა. ამ ეტაპზე მას ოპერაციული ჩარევა არ ესაჭიროება, თუმცა მდგომარეობა ძალიან საყურადღებოა და საჭიროებს ინტენსიურ მეთვალყურეობას", - განაცხადა სერგეენკომ.
შსს-ს ინფორმაციით, საქმე უკვე აღიძრა გაუფრთხილებლობით ჯანმრთელობის დაზიანების მუხლით.