საქართველოს პრეზიდენტმა 226 პატიმარი შეიწყალა. ამის შესახებ შეწყალების კომისიის თავმჯდომარემ, ზვიად ქორიძემ დღეს პრესკონფერენციაზე განაცხადა. მისი თქმით, საპატიმროს დღეს 141 მსჯავრდებული დატოვებს.
„სულ შეწყალებულია 226 მსჯავრდებული. მათგან 141 დღესვე დატოვებს საპატიმროს, ხოლო 85 მსჯავრდებულს შეუმცირდა სასჯელი. შეწყალების კომისიამ სულ 1 604 პირის საქმე განიხილა. შეწყალების აქტი 13 ქალს და 2 არასრულწლოვან მსჯავრდებულს შეეხო. 13 ქალბატონიდან საპატიმროს დღეს 12 დატოვებს," - განაცხადა ქორიძემ.
შეწყალების კომისიის თავმჯდომარის განცხადებით, შეწყალებულთა შორის 1 უვადო პატიმრობაში მყოფი მსჯავრდებულია, რომელიც, მისივე თქმით, მკვლელობისთვის იხდიდა მსჯავრს.
