„ერთიანი ნაციონალური მოძრაობის“ წევრი, პარლამენტარი სალომე სამადაშვილი ამბობს, რომ გია ვოლსკის მხრიდან მის მიმართ გენდერულად დისკრიმინაციული ენის გამოყენების გამო პარლამენტის გენდერული თანასწორობის საბჭოს მიმართავს.
„საქართველოში პოლიტიკაში ქალთა როლის გაძლიერება მნიშვნელოვანი ამოცანაა. პარლამენტში კვოტირების სისტემის შემოღებაზე ვფიქრობთ, რათა პარლამენტში ქალთა თანამონაწილეობა გავაძლიეროთ. სამწუხაროდ, პარლამენტის უმაღლესი თანამდებობის პირებს, მათ შორის გია ვოლსკის არ ესმის, რას ნიშნავს გენდერულად დისკრიმინაციული ენის გამოყენება და კნინობითი ფორმით მიმართვა ქალი კოლეგების მიმართ. გენდერული თანასწორობის საბჭოს მივმართავ, რომ 9 ოქტომბერს მომხდარი ინციდენტი განიხილონ და შესაბამისი რეაგირება მოახდინონ, რადგან ეს მნიშვნელოვანია არა მხოლოდ იმ ქალებისთვის, ვისაც პოლიტიკაში მონაწილეობა სურთ, არამედ ყველა ქალისთვის, ვინც პროფესიულ გარემოში უსაფრთხოდ და დაცულად უნდა იგრძნოს“, - განაცხადა სამადაშვილმა.
თავდაცვისა და უშიშროების საპარლამენტო კომიტეტის სხდომაზე გია ვოლსკისა და სალომე სამადაშვილს შორის შელაპარაკება მოხდა. „რა გაყვირებს, გოგო“- ამ სიტყვებით მიმართა გია ვოლსკიმ სალომე სამადაშვილს.
პარლამენტის გენდერული თანასწორობის საბჭოს თავმჯდომარე პარლამენტის პირველი ვიცე-სპიკერი თამარ ჩუგოშვილია.