თბილისის საქალაქო სასამართლომ კანონიერ ქურდობაში ბრალდებული პირის მიმართ გამამართლებელი განაჩენი გამოიტანა.
საინფორმაციო სააგენტო „ინტერპრესნიუსის" ცნობით, მოსამართლე ბესიკ ბუგიანიშვილმა ხდრ ხდრიანი, მეტსახელად „ხიდირ მასივსკი“ წარდგენილ ბრალში გაამართლა და სასამართლო დარბაზიდან გაათავისუფლა.
როგორც ხდრიანის ადვოკატი თამარ აბესაძე აცხადებს, სასამართლოს გადაწყვეტილება სამართლიანი და კანონიერი იყო.
„სასამართლომ კანონიერი გადაწყვეტილება მიიღო. პროკურატურამ ვერ წარადგინა ვერც ერთი მტკიცებულება იმისა, რომ დაედასტურებინა წარდგენილი ბრალი. არ არსებობს არც იმის მტკიცებულება, რომ ჩემი დაცვის ქვეშ მყოფი რამენაირ ე.წ. გარჩევებსა თუ „ობშიაკების“ აკრეფაში ყოფილიყო ჩართული, ან მისი დავალებით ხდებოდა რაიმე სახის უკანონობა. შესაბამისად, მოსამართლემ შეაფასა ყველა მტკიცებულება და გაამართლა ხდრ ხდრიანი“, - განაცხადა აბესაძემ.