იურიდიულ საკითხთა კომიტეტის სხდომაზე „ქართული ოცნების“ დეპუტატებმა კიდევ ერთხელ დაადასტურეს, რომ საკონსტიტუციო ცვლილებებზე პრეზიდენტის ვეტოს დაძლევენ.
„ტყუილია, რომ ჩვენ ვეხვეწებოდით პრეზიდენტს ვეტოს დადებას. ჩვენ შევთავაზეთ პრეზიდენტს, რომ დასრულდებოდა ხვალვე ამ რეფორმის ვენეციის კომისიის მიერ აღიარებული პროცესი, მას რომ ჩვენი რჩევა გაეთვალისწინებინა და შეესრულებინა პოზიტიური როლი საკონსტიტუციო რეფორმის პროცესში.“ - განაცხადა მამუკა მდინარაძემ კომიტეტის სხდომაზე. უმრავლესობის წევრებმა პრეზიდენტის საპარლამენტო მდივანი ანა დოლიძე და პრეზიდენტი გიორგი მარგველაშვილი პოლიტიკური პოზიციის ქონაში დაადანაშაულეს და მოტივირებული შენიშვნები არ გაითვალისწინეს. სხდომაზე, უმრავლესობის წევრების თქმით, პრეზიდენტის შენიშვნები არ შეესაბამებოდა „ქართული ოცნების“ მიერ შეთავაზებულ ცვლილებებს.
პრეზიდენტის ადმინისტრაციის უფროსის გიორგი აბაშიშვილის თქმით, ანა დოლიძე ცდილობდა უმრავლესობის დარწმუნებას საქართველოს კონსტიტუციის კონსენსუსით მიღებაში, მაგრამ სანაცვლოდ მხოლოდ პირადი შეურაცხყოფა მიიღო. „ძალიან სამწუხაროა, რომ უმრავლესობამ მსგავსი გარემოს შექმნა გადაწყვიტა. თუმცა, იმედი გვაქვს, რომ ასეთი ტიპის განწყობის მიუხედავად, უმრავლესობა პრეზიდენტის მოტივირებულ შენიშვნებს გაიზიარებს“ - უთხრა ჟურნალისტებს გიორგი აბაშიშვილმა.