პარლამენტის რიგგარეშე სხდომაზე საპარლამენტო უმრავლესობამ საკონსტიტუციო ცვლილებებზე პრეზიდენტის ვეტო 110 ხმით დაძლია. პრეზიდენტის მოტივირებულ შენიშვნები მხოლოდ 8 პარლამენტარმა გაიზიარა. სხდომაზე 124 პარლამენტარმა გაიარა რეგისტრაცია. 

საქართველო კონსტიტუციის ახალი რედაქცია პარლამენტმა დაამტკიცა 117 ხმით, 7-ის წინააღმდეგ. პარლამენტის თავჯდომარემ დეპუტატებს ახალი კონსტიტუციის მიღება მიულოცა. 

შეგახსენებთ, რომ პრეზიდენტმა საკონსტიტუციო ცვლილებებს ხელი არ მოაწერა და პარლამენტს მოტივირებული შენიშვნებით დაუბრუნა.

„მოტივირებულ შენიშვნებში პირველი 4 საკითხი თავიდან ბოლომდე მმართველი პარტიის საკითხებია. ისინი, რომლებიც „ქართულმა ოცნებამ“ ვენეციის კომისიასთან ვალდებულებით აიღო ჩასასწორებლად. ეს 4 საკითხი უცვლელად გადმოდის შენიშვნებში. ესაა ბონუსის, აღმსარებლობის, ბლოკებისა და საკონსტიტუციო სასამართლოს საკითხები. მეხუთე საკითხიც ასევე „ქართულ ოცნებას“ ეკუთვნის. ეს ის საკითხია, რომელზეც ჩვენ გესაუბრებოდით თუნდაც საკონსტიტუციო განხილვების დროს. ესაა 2020 წელს პროპორციული არჩევების დანიშვნის საკითხი. „ამ საკითხს ვინც იცნობს, იცის, რომ მმართველ პოლიტიკურ გუნდს კონსტიტუციის მიღების მომენტში აკლდა ხმები სწორედ ამ საკითხიდან გამომდინარე. მაგრამ საპარლამენტო ოპოზიციასთან, ასევე, არასაპარლამენტო ოპოზიციასთან არის შეთანხმება, რომ ოპოზიციური ხმები, იმ შემთხვევაში თუ „ქართული ოცნება“ ამ საკითხის გატანას მხარს დაუჭერს, იქნება დამატებული. ანუ ოპოზიცია მისცემს ხმას საკონსტიტუციო ცვლილებებს და შესაბამისად ეს საკითხიც, სრულიად უმტკივნეულოდ იქნება გათვალისწინებული კონსტიტუციაში“, - განაცხადა გიორგი მარგველაშვილმა.