ბიორკის კონცერტზე დასასწრები დაბალფასიანი ბილეთები უკვე ამოიწურა. ამის შესახებ „ლიბერალს“ SOU ფესტივალის პრესსამსახურში განუცხადეს. 

ბილეთები დღეიდან, 16 ოქტომბრიდან დილის 10 საათიდან იყიდება, თუმცა დაბალფასიანი ბილეთები უკვე ამოიწურა. ამ ეტაპზე ბილეთების ფასი 200 ლარიდან იწყება და 750 ლარამდე აღწევს.

ბიორკის კონცერტი თბილისში 31 ოქტომბერს თბილისის საკონცერტო დარბაზში და 3 ნოემბერს თბილისის ოპერისა და ბალეტის სახელმწიფო თეატრში გაიმართება. როგორც ფესტივალმა 14 ოქტომბერს დააანონსა, ბილეთის ფასი 50-80 ლარიდან დაიწყებოდა.

ფესტივალის პრესსამსახურში აცხადებენ, რომ პროექტი მაღალბიუჯეტიანია, შესაბამისად, დაბალფასიანი ბილეთების რაოდენობა შეზღუდული იყო - „რამდენიმე ათეული“. 

ღონისძიების მხარდამჭერია Check in Georgia. იჯარის ხარჯს ეკონომიკის სამინისტრო სარეზერვო ფონდიდან აანაზღაურებს.