თბილისის საპატიო მოქალაქეების დაჯილდოებისა და საზეიმო კონცერტის ორგანიზებისთვის თბილისის ბიუჯეტიდან 194 728, 32 ლარი დაიხარჯა.
ღონისძიება თბილისობის დღესასწაულის ფარგლებში 8 ოქტომბერს ლეღვთახევში გაიმართა.
შესყიდვების სააგენტოს ვებგვერდზე განთავსებული ხელშეკრულების მიხედვით, ღონისძიების ფარგლებში გაჟღერდა ქალაქური ჟანრის მუსიკა, ამონარიდები მუსიკალური ფილმებიდან და სპექტაკლებიდან, მონაწილეობდა ევგენი მიქელაძის სახელობის ეროვნული მუსიკალური ორკესტრი, რამდენიმე მუსიკალური ბენდი, 40-ზე მეტი სოლო შემსრულებელი.
აღსანიშნავია, რომ ეს მომსახურება მერიამ გამარტივებული შესყიდვის წესით შეიძინა, რაც ნიშნავს, იმას, რომ მიმწოდებელი კომპანიის გამოსავლენად ტენდერი არ გამართულა და მერიამ თავად აირჩია ის. ამ შემთხვევაში მიმწოდებელი იყო კომპანია შპს Art One, რომლის 50%-50%-ის მფლობელი დავით დოიაშვილი და ლევანი აბულაძეა.
საპატიო თბილისელის წოდება წელს 13 მოქალაქეს მიენიჭა. ესენი არიან: ევროკომისარი იოჰანეს ჰანი, ჩოგბურთელი ალექსანდრე მეტრეველი, ლიტერატორი და ჟურნალისტი თამაზ ტყემალაძე, ექიმი და მეცნიერი რომან შაქარიშვილი, ექიმი კარდიოლოგი გულნარა ჩაფიძე, მეცნიერი და ქიმიკოსი ეთერ ქემერტელიძე, კომპოზიტორი ვაჟა დურგლიშვილი, მომღერალი ლადო ათანელი, კომპოზიტორი თამაზ ყურაშვილი, მსახიობი, რეჟისორი და სცენარისტი მერაბ თავაძე, კალათბურთელი ზაზა ფაჩულია, სპორტული ჟურნალისტი, პუბლიცისტი და ფოტოგრაფი დემიკო ლოლაძე, პედაგოგი, მთარგმნელი და პუბლიცისტი ზაირა დავარაშვილი.
მომსახურების ხარჯთაღრიცხვა იხილეთ დანართში:
