ერაყის პრემიერ-მინისტრის, ჰაიდარ ალ-აბადის ბრძანებით, სამთავრობო ძალებმა ქურთისტანზე შეტევა დაიწყო. სამხედრო კამპანია, რომელსაც ბაღდადმა „უსაფრთხოების დაცვის“ ოპერაცია უწოდა, ქალაქ კირკუკის ქურთებისგან გათავისუფლებას ისახავს მიზნად.

კირკუკის რეგიონი ბაღდადსა და ერბილს შორის სადავო ტერიტორიაა. რეგიონის მოსახლეობას შეადგენენ როგორც ქურთები, ისე არაბები. 2015 წელს „ისლამური სახელმწიფოს“ შეტევებისგან როგორც ქალაქი, ისე კირკუკის გაზითა და ნავთობით მდიდარი მიწები ქურთულმა ჯარმა „პეშმერგამ“ დაიცვა. ამის გამო, ბოლო წლებია, ამ მხარეს ისინი აკონტროლებენ. ერაყის ქურთისტანის მიერ დამოუკიდებლობის რეფერენდუმის შემდგომ კი, ბაღდადი გააქტიურდა და ქურთებისგან კირკუკის დაბრუნება მოითხოვა.

ერბილსა და ბაღდადს შორის უშედეგო მოლაპარაკების შემდეგ, ერაყის პრემიერ-მინისტრმა ჰაიდარ ალ-აბადიმ ქურთებს ულტიმატუმი წაუყენა და 48 საათში ტერიტორიის გათავისუფლება მოსთხოვა. 16 ოქტომბერს სამხედრო ოპერაციაც დაიწყო.

ჯერჯერობით ქურთი ჯარისკაცები უბრძოლველად იხევენ უკან. ერაყის სამთავრობო ძალებმა უკვე დაიკავეს ქალაქი კირკუკი. ქურთული მედიასაშუალებების ცნობით, ქალაქის თავზე დაფრინავენ ამერიკული სამხედრო თვითმფრინავები, რეგიონის სხვა ადგილებში შეტაკებების შედეგად კი „პეშმერგას“ 40-მდე მებრძოლია დაჭრილი.

ფოტო: The Guardian