ჯორჯ სოროსმა ფონდ „ღია საზოგადოებას" 18 მლრდ დოლარამდე გადაურიცხა - ამის შესახებ ინფორმაციას The Wall Street Journal ავრცელებს.
ტრანზაქციის შემდეგ, „ღია საზოგადოება" ფილანტროპიურ ორგანიზაციებს შორის ერთ-ერთ მოწინავე პოზიციაზე აღმოჩნდა - იგი რიგით მეორე ყველაზე დიდი ორგანიზაცია გახდა აშშ-ში. National Philanthropic Trust-ის 2014 წლის მონაცემებით, პირველ ადგილს ბილ და მელინდა გეითსების ფონდი იკავებს.
87 წლის სოროსი ფონდის საინვესტიციო კომიტეტის თავმჯდომარეა. პროექტების დაფინანსება მან 1979 წელს, აღმოსავლეთ ევროპაში კომუნიზმის წინააღმდეგ ბრძოლით დაიწყო. 1984 წელს მან ფონდი უნგრეთში დააარსა. უნგრეთში როგორც კომუნისტური, ისე ნაცისტური ოკუპაციის პერიოდში ცხოვრების შემდეგ, სოროსი „ღია საზოგადოებების" განვითარებას ისეთ ქვეყნებში ცდილობდა, სადაც ძალაუფლება ავტორიტარულ მთავრობებს ჰქონდათ. მან ფონდ „ღია საზოგადოებას" სახელი ფილოსოფოს კარლ პოპერის წიგნის მიხედვით დაარქვა. პოპერი მისი ერთ-ერთი მასწავლებელი იყო, რომელიც ლიბერალურ დემოკრატიას იცავდა.