მოქანდაკე და საქართველოს მერვე მოწვევის პარლამენტის წევრი გოგი ოჩიაური 90 წლის ასაკში გარდაიცვალა. ოჩიაური 1927 წლის 10 იანვარს დუშეთის რაიონის სოფელ შუაფხოში დაიბადა. 1953 წელს დაამთავრა თბილისის სახელმწიფო სამხატვრო აკადემიის ქანდაკების ფაკულტეტი. იყო თბილისის სახელმწიფო სამხატვრო აკადემიის პროფესორი და ქანდაკების ფაკულტეტის სამხატვრო კლასის ხელმძღვანელი.
აკადემიის დამთავრების შემდეგ მონაწილეობდა როგორც ადგილობრივ, ისე საერთაშორისო გამოფენებში. მის ნამუშევრებს შორისაა: „ვაჟა-ფშაველა“, „ზღვა“, „შენ ხარ ვენახი“, „ქალის ტორსი“, „სიცოცხლის ხე“, „რეკვიემი“, ალეგორიური ქანდაკებისა „მუსიკა“, „რესტავრაცია“. არის დამდგმელი მხატვარი ფილმისა „ალავერდობა“ და ავტორი სამენოვანი წიგნისა — „ევროპული ქანდაკების ბუნებისათვის“.
გოგი ოჩიაურს 2005 წელს გადაეცა ღირსების ორდენი, 2012 წელს კი - ბრწყინვალების საპრეზიდენტო ორდენი.