სახალხო დამცველმა „დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობაზე“ ანგარიში გამოაქვეყნა. სადაც ერთ-ერთ ყველაზე მწვავე პრობლემად შრომითი და წინასახელშეკრულებო პირობებია დასახელებული.

ანგარიშის მიხედვით, ომბუდსმენმა შეისწავლა სხვადასხვა ვებგვერდზე გამოქვეყნებული დისკრიმინაციული განცხადებები ვაკანსიების შესახებ და დაადგინა, რომ მათი უმეტესობა შეიცავს სქესზე ორიენტირებულ ფრაზეოლოგიას. „მაღალანაზღაურებად, საპასუხისმგებლო სამუშაოზე სასურველ კანდიდატს მამაკაცი წარმოადგენს, იმ პოზიციებზე კი, რომლებიც განსაკუთრებულ კვალიფიკაციას არ მოითხოვს, დამსაქმებელი „სასიამოვნო გარეგნობის მქონე“, „18-დან 25 წლამდე“, „დაუოჯახებელ“ გოგონას ეძებს.“

ანგარიშში სახალხო დამცველი აღნიშნავს, რომ, ერთი მხრივ, თავად დამსაქმებლების მხრიდან აღინიშნება დისკრიმინაციული მოპყრობა. მეორე მხრივ, კი დასაქმების ვებგვერდები დისკრიმინაციული კრიტერიუმების შემცველი განცხადებების გავრცელებით უწყობენ ხელს ნეგატიური სტერეოტიპების გამყარებას. ამის გამო, ომბუდსმენმა ვებგვერდის (jobs.ge) მიმართ გამოსცა ზოგადი წინადადება და შპს „ელიტ სერვისს“ რეკომენდაციით მიმართა. სახალხო დამცველმა საქართველოს შრომის, ჯანმრთელობისა და სოციალური დაცვის სამინისტროსაც მიმართა და ამ პრობლემით დაინტერესებისკენ მოუწოდა.

სახალხო დამცველი აღნიშნავს, რომ პრობლემად რჩება შრომითი უფლებები სკოლებსა და ბაღებში. მაგალითად, პრობლემაა სადამრიგებლო კლასების განაწილება. ასევე ომბუდსმენთან შესული განცხადებები ეხებოდა დისკრიმინაციას პოლიტიკური, შეზღუდული შესაძლებლობების, განსხავევებული შეხედულებებისა და ეთნიკური წარმომავლობის მიხედვით.
სახალხო დამცველის ანგარიში 2016 წლის 1 სექტემბრიდან 2017 წლის 1 სექტემბრამდე მომზადდა და საქართველოში „ანტიდისკრიმინაციული კანონის“ შესრულებას უწევდა ზედამხედველობას.