„ქართული ოცნების“ თბილისის მერობის კანდიდატმა, კახა კალაძემ, დედაქალაქის მართვის პოლიტიკის წარდგენისას განაცხადა, რომ საზოგადოებრივი ტრანსპორტი უნდა გახდეს კომფორტული, პოპულარული და საზოგადოებრივი ტრანსპორტით სარგებლობა არ უნდა იყოს სირცხვილი.
„დღეს სატრანსპორტო პოლიტიკის მიმართულებით სერიოზული პრობლემები არსებობს და ჩვენ დაგეგმილი გვაქვს კონკრეტული პროექტების განხორციელება. მაგალითად: არსებული ყვითელი ავტობუსების პარკის ჩანაცვლება 700 ახალი ეკოლოგიურად სუფთა ევროპული ტიპის ავტობუსით. მერიამ 145 ახალი ავტობუსი შემოიყვანა, რისთვისაც დიდ მადლობას გადავუხდით, მაგრამ ეს საკმარისი არ არის და ჩვენ დამატებით გვჭირდება 700 ავტობუსი, დედაქალაქის მოსახლეობის უზრუნველსაყოფად. გავხადოთ საზოგადოებრივი ტრანსპორტი კომფორტული, და არამხოლოდ კომფორტული, პოპულარული რათა საზოგადოებრივი ტრანსპორტით მგზავრობა სირცხვილი არ იყოს. ჩვენ ასევე ვგეგმავთ მეტროს მოდერნიზებას, როგორც ვაგონების, ასევე მეტროსადგურების“, - განაცხადა „ქართული ოცნების" თბილისის მერობის კანდიდატმა, კახა კალაძემ.
