ISFED-მა წინსაარჩევნო მონიტორინგის ბოლო შუალედური ანგარიში გამოაქვეყნა. „სამართლიანი არჩევნებისა და დემოკრატიის საერთაშორისო საზოგადოების“
მიხედვით, კენჭისყრის დღის მოახლოებასთან ერთად ზეწოლის ფაქტები შესამჩნევად გახშირდა, რაც საფრთხეს უქმნის თავისუფალ და სამართლიან წინასაარჩევნო გარემოს.
„სამართლიანი არჩევნების“ ანგარიშის მიხედვით, დრამატულად მოიმატა ოპოზიციური პარტიების კანდიდატებისა და აქტივისტების მიმართ სავარაუდოდ პოლიტიკური ნიშნით განხორციელებულმა ზეწოლისა და დაშინების შემთხვევებმა. სავარაუდოდ, ამის გამო, 6 ოლქში საარჩევნო სუბიეტებად რეგისტრირებულმა პირებმა კანდიდატურები მოხსნეს. „საანგარიშო პერიოდში გამოვლინდა ზეწოლა/მუქარის 23; სამსახურიდან სავარაუდოდ პოლიტიკური ნიშნით გათავისუფლების 1; ძალადობის 2; წინასაარჩევნო კამპანიისთვის ხელის შეშლის 3; ადმინისტრაციული რესურსის გამოყენების 6; შენობა-ნაგებობების არამართლზომიერი გამოყენების 1; აგიტაციაში კანონდარღვევით მონაწილეობის 6; სააგიტაციო მასალების დაზიანების 11 შემთხვევა. ასევე საყურადღებოა საარჩევნო ადმინისტრაციის საქმიანობაში არსებული გადაცდომების 6 ფაქტი.“ - აღნიშნულია ISFED-ის ანგარიშში.
ანგარიშის მიხედვით, ასევე გახშირდა სოციალური ქსელებით წინასააარჩევნო კამპანიაში დეზინფორმაციის გავრცელება კონურენტების მიმართ. მათ შორის, განსაკუთრებით გამოკვეთილი და შესამჩნევია დეზინფორმაციის გავრცელება დამოუკიდებელი კანდიდატის ალეკო ელისაშვილის მიმართ.
ანგარიში მოიცავს 26 სექტემბრიდან 16 ოქტომბრის ჩათვლით პერიოდს. რომლის დროსაც, ISFED-ის მიხედვით, წინასაარჩევნო კამპანია შესამჩნევად დინამიკური გახდა. „სამართლიანი არჩევნების“ დამკვირვებლები საარჩევნო სუბიექტების მიერ გამართულ 379 საჯარო შეხვედრას დააკვირდნენ.
