ყოფილ სახელმწიფო მინისტრ ალექსი პეტრიაშვილზე თავდასხმაში მსჯავრდებულ ლევან მექვაბიშვილს საპროცესო შეთანხმება გაუფორმდა. პროკურატურის ცნობით, აღნიშნული გადაწყვეტილება 2017 წლის 14 მარტს თბილისის სააპელაციო სასამართლოში გაფორმდა.
„2017 წლის 14 მარტს, მსჯავრდებულ ლევან მექვაბიშვილთან თბილისის სააპელაციო სასამართლოში, დაზარალებულ ალექსი პეტრიაშვილის თანხმობით და მისი პოზიციის გათვალისწინებით, ასევე იმის გათვალისწინებით, რომ ლევან მექვაბიშვილმა აღიარა ჩადენილი დანაშაული და შეურიგდა დაზარალებულს, დამტკიცდა საპროცესო შეთანხმება“, - ნათქვამია პროკურატურის განცხადებაში.
საპროცესო შეთანხმების მიხედვით, ლევან მექვაბიშვილს საქართველოს სსკ 117 მუხლის მე-5 ნაწილით გათვალისწინებული დანაშაულის ჩადენისთვის სასჯელის ზომად განესაზღვრა 7 წლით თავისუფლების აღკვეთა, საიდანაც 3 წელს მოიხდის სასჯელაღსრულების დაწესებულებაში, ხოლო 4 წელი ჩაეთვლება პირობითად.
შსს-ს ინფორმაციით, 2016 წლის 26 თებერვალს, თბილისში, საბურთალოზე, წმ. გიორგის სახელობის ეკლესიის მიმდებარე ტერიტორიაზე არსებულ ძმათა სასაფლაოზე, ალექსი პეტრიაშვილს თავს დაესხნენ. ლევან მექვაბიშვილმა თანამზრახველთან ერთად, ალექსი პეტრიაშვილს თავის არეში ჩაქუჩით დაზიანებები, ხოლო ცეცხლსასროლი იარაღიდან გასროლით ჭრილობები მიაყენა.