შსს მარნეულის რაიონში მომხდარ ინციდენტთან დაკავშირებით განცხადებას ავრცელებს. სამინისტროს განცხადებით სოფელ ყიზილაჯლოში, დაუდგენელმა პირმა ცეცხლი გახსნა პარტია „ქართული ოცნების“ საარჩევნო შტაბის მიმდებარე ტერიტორიაზე და ავტომატური ცეცხლსასროლი იარაღიდან გასროლით 4 პირი, მათ საკრებულოს მაჟორიტარობის კანდიდატი დაჭრა. „დაჭრილები სასწრაფო სამედიცინო დახმარების ბრიგადამ საავადმყოფოში გადაიყვანა. მათ სიცოცხლეს საფრთხე არ ემუქრება. მომხდარ ფაქტთან დაკავშირებით შინაგან საქმეთა სამინისტროში გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.“ - წერია შსს-ს გაცხადებაში. სამინისტროს ინფორმაციით, შემთხვევის ადგილზე მალევე ჩავიდა შს მინისტრი გიორგი მღებრიშვილი, მოინახულა დაჭრილები და გამოძიების დეტალებს გაეცნო.
სროლის შედეგად დაჭრილები მოინახულა ჯანმრთელობისა და სოციალური დაცვის მინისტრმა დავით სერგეენკომაც. როგორც მან ჟურნალისტებს განუცხადა, ორ დაშავებულს ოპერაცია ჩაუტარდა და მათ ინტენსიურ თერაპიაში დასჭირდებათ მკურნალობის გაგრძელება, თუმცა ასევე კლინიკაში რჩება კიდევ ორი დაშავებული.
„ქართული ოცნების“ ოფისთან მომხდარ შემთხვევაში პოლიტიკურ ანგარიშსწორებას გამორიცხავს იუსტიციის მინისტრი თეა წულუკიანი. „ამ ეტაპზე, არავითარ შემთხვევაში არ შეიძლება რაიმე ვერსიებზე საუბარი, რადგან მიმდინარეობს გამოძიება. ამ საკითხის ვერავითარი პოლიტიზება ვერ მოხდება მარტო იქიდან გამომდინარე, რომ ერთ-ერთ დაჭრილ პირს კანდიდატის სტატუსი აქვს. ჩვენ ვფიქრობთ, რომ ამ თემის არჩევნებსა და პოლიტიკასთან დაკავშირების გარეშე უნდა დავაკვირდეთ პროცესს და დაველოდოთ გამოძიების შედეგებს.“ - თქვა წულუკიანმა მედიასთან საუბრისას.