არასამთავრობო ორგანიზაცია „ტოლერანტობისა და მრავალფეროვნების ინსტიტუტის" (TDI) დამკვირვებლის შოთა თუთბერიძის ცნობით, მარნეულში, სოფელ ყიზილაჯლოს N89 საარჩევნო უბანზე საოლქო საარჩევნო კომისიის წევრებმა შენობა შიგნიდან ჩაიკეტეს და დამკვირვებლებს არ უშვებენ.
„არც ერთს არ გვიშვებენ, გამოძახებულია პოლიცია და ველოდებით. ასევე უბანზე იმყოფება 3 პირი, რომელთაც საიდენტიფიკაციო „ბეჯი“ არ აქვთ, უცნობები არიან, რაც ასევე მძიმე დარღვევაა“, - ამბობს შოთა თუთბერიძე
TDI-ის წარმომადგენლის ცნობით, დღეს ამავე უბანზე გადასატანი ყუთი გაიტაცეს
ორგანიზაციის ინფორმაციით მარნეულის ოლქის 48-ე უბანზე, სადაც ასევე არიან TDI-ის დამკვირვებლები, ამჟამად იმყოფება ის პირი, რომელმაც დილით სიტყვიერი და ფიზიკური შეურაცხყოფა მიაყენა „ტოლერანტობისა და მრავალფეროვნების ინსტიტუტის" წარმომადგენელს და მონაწილეობდა გადასატანი ყუთის გატაცებაში.
„ამ წუთებში, 48-ე უბანზე, ხმის დათვლის პროცესში ეს პირი იძლევა მითითებებს, კომისიის წევრები მას ემორჩილებიან, არის აგრესიული დამკვირვებლების მიმართ. TDI-მ დაადგინა, რომ აღნიშნული პირი არის მარნეულის მუნიციპალიტეტის გამგეობის თანამშრომელი ნურლან მამიშოვი“, - აცხადებს TDI