თიანეთის თემის მერობის არჩევნებში „ქართული ოცნების“ კანდიდატმა, ლელა ქიტესაშვილმა გაიმარჯვა. მან მხოლოდ 4 ხმით დაამარცხა მმართველი პარტიის ყოფილი წევრი და პარტია „თამაზ მეჭიაური ერთიანი საქართველოსთვის“ დამფუძნებელი თამაზ მეჭიაური.
თიანეთის საარჩევნო ოლქში სულ 20 უბანია. საინტერესოა, რომ ყველა უბნის მონაცემების დათვლის მიუხედავად, ცესკოს ვებგვერდზე არჩევნებში თამაზ მეჭიაური ერთი ხმით უსწრებს ქიტესაშვილს. მან 3077 ხმა მიიღო, როცა მმართველი პარტიის კანდიდატს 3076 აქვს. მაგრამ, როგორც თიანეთის საოლქო საარჩევნო კომისიის თავმჯდომარემ, გიორგი ცალუღელაშვილმა „ლიბერალს“ განუცხადა, არჩევნები, რეალურად, ლელა ქიტესაშვილმა 4 ხმით მოიგო, საიტზე კი არასწორად არის მითითებული.
