თბილისის ახლად არჩეული მერი კახა კალაძე აცხადებს, რომ მერიაში საკადრო და სტრუქტურული ცვლილებები იქნება. როგორც მან დღეს გამართულ პრესკონფერენციაზე განმარტა, საზოგადოებას მალე ექნება ინფორმაცია, ვინ იქნებიან მისი გუნდის წევრები და ვინ რა პოზიციას დაიკავებს. კალაძის თქმით, მისი გუნდისთვის ძალიან მნიშვნელოვანია კომპეტენტურობა, პროფესიონალიზმი და გამოცდილების მქონე ადამიანები.
"საკადრო ცვლილებები იქნება. იქნება რეფორმები, იქნება სტრუქტურული ცვლილებები. სხვათაშორის, ძალიან ბევრი კომპეტენტური ადამიანი მუშაობს მერიაში და მაქსიმალურად შევეცდებით ყველას პროფესიონალიზმი იქნას გამოყენებული ქალაქის საკეთილდღეოდ", - განაცხადა კალაძემ.
მისი თქმით, მერიაში მისი გუნდის მუშაობა ძალიან გამჭვირვალე იქნება და ასე გაგრძელდება 4 წლის განმავლობაში.