ვაგზლის მიმდებარე ტერიტორიაზე, წიგნის მაღაზიაში შუახნის მამაკაცმა თავი ჩამოიხრჩო. შინაგან საქმეთა სამინისტროში აცხადებენ, რომ გამოძიება სს კოდქესის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. 

ერთ-ერთი თვითმხილველი, რომელიც აცხადებს, რომ ინციდენტის შემდეგ ადგილზე იმყოფებოდა, Facebook-ზე წერს, რომ მამაკაცი 45 წლის წიგნების გამყიდველი იყო.

„მეწიგნე მიშკამ ჩამოიხრჩო თავი. დინამოს სტადიონთან, წიგნების ბაზრობაზე, დახლებს შორის. იკივლეს ქალებმა, თავი გადააქნიეს კაცებმა... უხერხულად ავიტუზეთ სასკოლო წიგნების საყიდლად მისულები და ამ ამბავს შესწრებულები: ზოგს წიგნი შეგვრჩა ხელში, ზოგს - გადასახდელი ფული... ხანძარი რომ იყო, წიგნები დაეწვაო, ვალი ჰქონდაო, ჩვენსავითო, მეპროცენტემ მიაკითხაო და მისი წასვლის შემდეგ დახლების სიღრმეში ჩუმად შევიდა და და თავი ჩამოიხრჩოო 45 წლამდე კაცმა - მეწიგნე მიშკამ... ტიროდნენ ბაზრობის ქალები, უხმოდ იდგნენ კაცები და რაღაცნაირად სიჩუმე ჩამოვარდა უცებ: იმ სიჩუმეში, იმ ერთ წუთში თავის თავს სტიროდა ყველა, თავის ვალებს, თავის პრობლემებს, თავის ხვალეს... დღეს, საღამოს მოხდა ეს...." - წერს ნანა აკობიძე.