პარტია „ევროპული საქართველოს“ თბილისის საკრებულოს სიის პირველმა ნომერმა, გიორგი გაბაშვილმა „ლიბერალს“ განუცხადა, რომ საკრებულოს წევრობის უფლებამოსილება შეუწყდა დავით დარჩიაშვილსა და დავით ავალიანს, მათივე სურვილის საფუძველზე.
გაბაშვილის თქმით, მათ ადგილს „ევროპული საქართველოს“ ის მაჟორიატარი კანდიდატები დაიკავებენ, ვინც საკუთარ საარჩევნო ოლქებში ყველაზე მეტი ხმა მოაგროვა. ამის გამო, დარჩიაშვილისა და ავალიანის ნაცვლად საკრებულოში დავით ჟღენტი და ელენე ოზაშვილი შევლენ.
დღეს, თვითმმართველობის ორგანოში გადასვლაზე უარი თქვა, ასევე, „ერთიანი ნაციონალური მოძრაობის" პოლიტსაბჭოს თავმჯდომარემ, ნიკა მელიამ, რომელიც თბილისის საკრებულოს არჩევნებში პარტიის პროპორციულ სიას სათავეში ედგა. მელიამ პარლამენტის წევრად დარჩენის გადაწყვეტილება მიიღო. თბილისის საკრებულოში ნიკა მელიას ადგილს „ნაციონალური მოძრაობიდან" მარიკა დათუკიშვილი დაიკავებს.
საკრებულოს წევრის უფლებამოსილება შეუწყდა „ქართული ოცნების“ წევრს და საკრებულოს ყოფილ თავმჯდომარეს გიორგი ალიბეგაშვილს, რომელიც ენის სახელმწიფო დეპარტამენტის ხელმძღვანელად დაინიშნა.
