ბილ გეითსი ალცჰაიმერის დაავადების დასამარცხებლად კვლევისთვის 50 მლნ დოლარს გასცემს. 

CNN-ის ინფორმაციით, გეითსი გეგმავს, თანხა „დემენციის აღმოჩენის ფონდში" გადარიცხოს. ფონდი კვლევითი ცენტრია, რომელიც დაავადების გამომწვევ მიზეზებს იკვლევს. მკვლევრები ტვინის უჯრედების იმუნურ სისტემას აკვირდებიან. 

ეს პირველი შემთხვევაა, როცა გეითსი ინვესტიციას არაგადამდები დაავადების წინააღმდეგ დებს. აქამდე იგი HIV-ის, მალარიისა და მსგავსი დაავადებების წინააღმდეგ გასცემდა ინვესტიციებს. 

„მჯერა, რომ ამ პრობლემის გადაწყვეტა შესაძლებელია. ნებისმიერი მკურნალობა დიდი წინგადადგმული ნაბიჯი იქნება იმ მდგომარეობიდან, რომელშიც ახლა ვართ" - უთხრა გეითსმა CNN-ს.

ალცჰაიმერის დაავადება დემენციის ყველაზე გავრცელებული ფორმა და სიკვდილიანობის მეექვსე ყველაზე გავრცელებული მიზეზია აშშ-ში. ალცჰაიმერის დიაგნოზს აშშ-ში ყოველ 66 წამში სვამენ. ამ დაავადებით 5 მილიონი ამერიკელი ცხოვრობს, რომელთა მკურნალობა წელიწადში 259 მილიარდი ჯდება. ეს კი იმას ნიშნავს, რომ მკურნალობის არარსებობის შემთხვევაში, 2050 წლამდე დაავადებულთა რაოდენობა 16 მლნ-მდე გაიზრდება  და წელიწადში მკურნალობის სახსრები 1 ტრილიონ აშშ დოლარს გაუტოლდება.