გარემოს დაცვის სამინისტრო რომელიმე სხვა მიმართულებას არ უნდა ექვემდებარებოდეს - განუცხადა ჟურნალისტებს პარლამენტის გარემოს დაცვის კომიტეტის თავმჯდომარემ, კახაბერ კუჭავამ . მისი თქმით, გარემოს დაცვის სამინისტრო უნდა იყოს ცალკე და ამის ვალდებულება ქვეყანას ასოცირების ხელშეკრულებით აქვს.
„გარემოს დაცვის სამინისტრო რომელიმე სხვა მიმართულებას არ უნდა ექვემდებარებოდეს, უნდა იდგეს ცალკე, ძლიერად, ამის ვალდებულება ასოცირების ხელშეკრულებით გვაქვს აღებული“,- თქვა კუჭავამ.
მისი თქმით, ის ოპტიმიზაციას მიესალმება, მაგრამ მას კითხვები რჩება გარემოს დაცვის სამინისტროს მიმართულებით, რადგან, მისი თქმით სამინისტრო უნდა გაძლიერდეს.
„კონკრეტული ინფორმაცია, ჯერჯერობით, არ გაგვაჩნია, ოპტიმიზაციასთან დაკავშირებით. ველოდებით მთავრობის მიერ მომზადებულ კანონპროექტს, რის შემდეგაც განვიხილავთ, რა მასშტაბის სტრუქტურული ცვლილებები იქნება გარემოს მიმართულებით. საერთოდ, ოპტიმიზაციას მივესალმებით. კითხვა გარემოს დაცვის სამინისტროს მიმართულებით გვრჩება. გარემოს დაცვის სამინისტრო, პირიქით, უნდა გაძლიერდეს“, - განაცხადა კუჭავამ.
გარემოს დაცვის სამინისტროს უერთდება სოფლის მეურნეობის სამინისტრო და გარემოსა დაცვისა და სოფლის მეურნეობის მინისტრის თანამდებობა ლევან დავითაშვილი დაიკავებს.
გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი უერთდება ეკონომიკისა და მდგრადი განვითარების სამინისტროს.
.
