დღეს განათლებისა და მეცნიერების მინისტრი მიხეილ ჩხენკელი პარლამენტში განათლების კომიტეტის თავმჯდომარეს, მარიამ ჯაშს შეხვდა. შეხვედრის შემდეგ მარიამ ჯაშმა ჟურნალისტებთან განაცხადა, რომ მათ თავიანთი თვალსაზრისი ერთმანეთს გააცნეს.
„ჩვენ განვიხილეთ ის ძირითადი პრობლემები, რომელიც რჩება სკოლამდელი ასაკის სისტემაში. განვიხილეთ ზოგადი განათლების სისტემაში მიმდინარე საკითხები; განვიხილეთ პროფესიული განათლების კუთხით შესამუშავებელი საკანონმდებლო ცვლილებები, რისთვისაც ემზადება სამინისტრო და ამისთვის გადასადგმელი გვექნება უმნიშვნელოვანესი ნაბიჯები. ასევე ვიმსჯელეთ უმაღლეს განათლებასა და მეცნიერებაზე. როგორც თავად უაღრესად გამოცდილი პედაგოგი და მეცნიერი, მას აქვს სწორედ ის ხედვა, რაც იქნება ჩვენი მეცნიერებისა და ტექნოლოგიური განვითარების კუთხით უმნიშვნელოვანესი“, - განაცხადა მარიამ ჯაშმა.
მისივე თქმით, ისინი შეთანხმდნენ ძალიან მჭიდრო თანამშრომლობაზე და განათლებისა და მეცნიერების მინისტრთან თვეში სულ მცირე ერთი სამუშაო შეხვედრა გაიმართება.