პარლამენტის თავმჯდომარე ირაკლი კობახიძე ამბობს, რომ საქართველოს კონსტიტუციაში სიტყვა „ხმოსანი“ ჩანაცვლდა ტერმინით „საარჩევნო კოლეგიის წევრი“.

„ხმოსანი“ ქილიკის საგანი გახდა და გადავწყვიტეთ, რომ ტერმინი ჩავანაცვლოთ, მიუხედავად იმისა, რომ ეს სიტყვა სიძველით ქართული წარმოშობისაა. ახალი ცვლილებებით, საუბარია საარჩევნო კოლეგიის წევრზე. პრეზიდენტს საარჩევნო კოლეგიის 300 წევრი აირჩევს“, – აღნიშნა კობახიძემ. 

პარლამენტის პლენარულ სხდომათა დარბაზში ახლად მიღებულ კონსტიტუციაში დაგეგმილი ცვლილებების პროექტის განხილვა მიმდინარეობს. 

სხვა ცვლილებებთან ერთად კონსტიტუციაში ტერმინი „ხმოსანი” აღარ იარსებებს. პროექტი ცვლილებების განხორციელებას პრეზიდენტის არჩევის წესთან დაკავშირებულ 50-ე მუხლშიც ითვალისწინებს, თუმცა ეს მხოლოდ ტერმინოლოგიური ცვლილებაა და „ხმოსანი“ ტერმინით - „საარჩევნო კოლეგიის წევრი“ იცვლება. 

საკონსტიტუციო ცვლილებები პარლამენტს უმრავლესობის 116 დეპუტატის ხელმოწერით წარედგინა.