„კარგია, თუ ჩემმა განცხადებამ დეპუტატი შალელაშვილი სამსახურში მიიყვანა და მუშაობა დააწყებინა“, - ამის შესახებ იუსტიციის მინისტრმა თეა წულუკიანმა ჟურნალისტებთან განაცხადა. ინფორმაციას 1tv ავრცელებს.
როგორც წულუკიანი აცხადებს, დეპუტატ შალელაშვილის შესახებ არაფერი სმენია, გარდა იმისა, რომ ის ხელფასს იღებს და სამსახურში არ დადის.
„დეპუტატ შალელაშვილის შესახებ ბევრი არაფერი მსმენია, მას არ ვიცნობ. მსმენია მხოლოდ ის, რასაც მედია ავრცელებდა, რომ რეალურად ეს არის პარლამენტში ერთადერთი დეპუტატი, რომელიც ხელფასს იღებს და სამსახურში არ დადის.
კარგია თუ ჩემმა განცხადებამ ის სამსახურში მიიყვანა და მუშაობა დააწყებინა. ახლა მნიშვნელოვანია, რომ ჩვენ ავირჩიოთ. ყველა დეპუტატს, რომლებიც მისგან განსხვავებით დღედაღამ შრომობენ, ვუსურვებ ნაყოფიერ სამუშაოს იმისთვის, რომ საქართველოს მომავალი ომბუდსმენი იყოს პასუხისმგებლიანი და მართლაც ამ პატივსაცემ საკონსტიტუციო ინსტიტუტს ვეღარავინ აკადროს ზედაპირულობა, ტყუილი და მიკერძოებულობა“, - თქვა თეა წულუკიანმა.
თეა წულუკიანი ომბუდსმენის იმ ანგარიშს გამოეხმაურა, სადაც „ციანიდის საქმეზე“ იყო საუბარი. მისი თქმით, უჩა ნანუაშვილი საქართველოს უსამართლო ომბუდსმენია.
მინისტრის ამ შეფასების შესახებ განცხადება გაავრცელა საპარლამენტო უმრავლესობის დეპუტატმა, შოთა შალელაშვილმა. მისი თქმით, მსგავსი განცხადება არ გაუკეთებია „ქართული ოცნების“ არცერთ ლიდერს.
„ვფიქრობ, რომ ასეთი უპასუხისმგებლო განცხადება არ გაუკეთებია „ქართული ოცნების’’ არცერთ ლიდერს და პოლიტიკური თანამდებობის პირს“, - განაცხადა შალელაშვილმა.
წულუკიანმა ასევე აღნიშნა, რომ ომბუდსმენის შეფასება გუშინდელი განცხადებით არ დაუსრულებია და მზად არის მასთან დებატებისთვის.
უმრავლესობის წევრი წულუკიანზე: ასეთი უპასუხისმგებლო რამ „ოცნებიდან“ არავის უთქვამს
წულუკიანი ნანუაშვილზე: ის არის პირველი უსამართლო ომბუდსმენი საქართველოსი
