„რადიო პალიტრის“ ეთერში თბილისის მერის მოადგილემ განაცხადა, რომ თბილისში ორი ახალი ინფრასტრუქტურული პროექტი იგეგმება. ბენდელიანის თქმით, ვაშლიჯვრიდან მარშალ გელოვანის ქუჩის მიმართულებით ესტაკადა გაკეთდება. გმირთა მოედანზე, „ლაგუნა ვერესთან“ კი გზა გაფართოვდება.

„ვაშლიჯვრიდან გელოვანის ქუჩისკენ მიმავალ გზაზე ძალიან დიდი საცობებია. აქ გვინდა, რომ ესტაკადა გავაკეთოთ. გმირთა მოედნიდან „ლაგუნა ვერეს” მიმართულებითაც დღის ნებისმიერ მონაკვეთში საცობია. აქ გვაქვს დაგეგმილი არსებული გზის გაფართოება, რათა გამტარიანობა მეტი ჰქონდეს.“ - თქვა ბენდელიანმა.

ირაკლი ბენდელიანის თქმით, მათ გეგმაში კიდევ ბევრი ინფრასტრუქტურლი პროექტი აქვთ. მათ შორის, ახალი გზის გაკეთება მარჯვენა სანაპიროზე, „ვეფხი და მოყმის” ძეგლთან.

ვაშლიჯვრიდან მარშალ გელოვანის ქუჩის მიმართულებით ესტაკადის მშენებლობა თბილისის მერს კახა კალაძეს წინასაარჩევნო პროგრამაში ჰქონდა. „ქართული ოცნების“ გუნდმა ამ პროექტზე სარეკლამო ვიდეოც მოამზადა.