კომპანია Alphabet-ის აღმასრულებელმა დირექტორმა ერიკ შმიდტმა, რომლის შვილობილი კომპანიაცაა Google, განაცხადა, რომ ისინი რუსული პროპაგანდის შეჩერებაზე მუშაობენ. შმიდტმა ეს კომენტარი იმ კრიტიკის საპასუხოდ გააკეთა, რომლის თანახმად, ამერიკული კომპანია რუსულ პროპაგანდის არხებს არ ზღუდავდა.

„ჩვენ ყურადღებით ვადევნებთ თვალს და ვმუშაობთ, რომ პროპაგანდის გამავრცელებელ ვებგვერდებს უფრო დაბალი შეფასება ჰქონდეთ“, - თქვა შმიდტმა ჰალიფაქსის საერთაშორისო უსაფრთხოების ფორუმზე. „ეს, ძირითადად, Russia Today-ის და Sputnik-ს ეხება. ჩვენ ყურადღებით ვაკვირდებით და ვმუშაობთ, რომ რანჟირების სისტემაში დაბლა დავწიოთ.“

Russia Today და Sputnik რუსეთის ხელისუფლების მიერ დაფინანსებული მედიასაშუალებებია. Russia Today ონლაინმედიასთან ერთად თანამგზავრული ტელევიზიაცაა, Sputnik კი ინტერნეტში 30 ენაზეა ხელმისაწვდომი. ორივე მათგანი ცნობილია, როგორც რუსეთის ხელისუფლების პროპაგანდის იარაღი.

თვის დასაწყისში აშშ-ის სახელმწიფო დეპარტამენტმა Russia Today უცხოეთის აგენტად შეაფასა. რუსული ორგანიზაციები კი ცდილობენ დაამტკიცონ, რომ მათ პროპაგანდის იარაღად არ იყენებენ და თავისუფალი მედიასაშუალებები არიან. ამ მხრივ, Google-ის მიერ მათი მედიასაშუალებად ცნობა და Google News-ით გავრცელება Russia Today-ის და Sputnik-ის საქმიანობას ხელს უწყობს.

ერიკ შმიდტის აზრით, მიუხედავად იმისა, რომ რუსული მედია დეზინფორმაციას ავრცელებს, ის მაინც მათი დაბლოკვის წინააღმდეგია. „მე ცნეზურა არ მიყვარს, უფრო მეტად რანჟირების მომხრე ვარ. ეს არის ჩვენი საქმე.“ - თქვა შმიდტმა.