ნუცუბიძის ფერდობზე გარდაცვლილი მამაკაცის, პაატა პავლიაშვილის გარდაცვალების მიზეზების დასადგენად ჩატარებული ექსპერტიზის დასკვნა დაიდო.
დასკვნის თანახმად, პავლიაშვილის გარდაცვალების მიზეზია ალკოჰოლური ინტოქსიკაციის შედეგად გამოწვეული სუნთქვის მწვავე უკმარისობა.
პროკურატურის განცხადებით, ექსპერტიზის დასკვნით, მის ორგანიზმში ნარკოტიკული ან ფსიქოტროპული ნივთიერების კვალი არ აღმოჩნდა
„გარდაცვლილს სხეულზე რაიმე სახის დაზიანებები არ აღენიშნება, გარდა სასწრაფო სამედიცინო დახმარების ბრიგადის მიერ განხორციელებული მანიპულაციისა“, - განაცხადეს პროკურატურაში.
მათივე ინფორმაციით, საქართველოს პროკურატურა განაგრძობს აქტიურ თანამშრომლობა პ.პ.-ს ოჯახის წევრებსა და მის ადვოკატთან.
„მათ საშუალება ჰქონდათ, გასცნობოდნენ სისხლის სამართლის საქმის მასალებს და ზემოხსენებულ ექპერტიზის დასკვნას. ამჟამად ტარდება კომპიუტერული ექსპერტიზა, რომელიც დასრულებული არ არის. პარალელურ რეჟიმში კვლავ მიმდინარეობს საგამოძიებო მოქმედებები, რომელთა ამოწურვის შემდეგ პროკურატურა საზოგადოებას მიაწვდის დეტალურ ინფორმაციას”, - განუცხადეს პროკურატურაში.
როგორც „რუსთავი 2-თან“ საუბრისას ოჯახის ადვოკატი ლევან ვეფხვაძე ამბობს, ექსპერტიზის დასკვნით, გამოირიცხა პოლიციის თანამშრომლების ფიზიკური ძალადობა პავლიაშვილზე, თუმცა შეასრულეს თუ არა მათ ჯეროვნად თავიანთი ფუნქცია, ეს არის გამოძიების გაგრძელებისა და სხვა მტკიცებულებების ერთობლიობით განსჯის საკითხი.
25 ოქტომბერს, 33 წლის პაატა პავლიაშვილი, პატრულის ორი თანამშრომლის მიერ ადმინისტრაციული წესით დაკავების დროს გარდაიცვალა. ორი ინსპექტორი, ნუცუბიძის ფერდობზე, მეზობლებს შორის მომხდარი კონფლიქტის საფუძველზე იმყოფებოდა. ინსპექტორებმა პაატას დაკავების გადაწყვეტილება მას შემდეგ მიიღეს, რაც იგი კონფლიქტში მონაწილე ერთ-ერთ მხარეს (მეგობარს) გამოესარჩლა.
თვითმხილველების თქმით, როდესაც პატრული პაატა პავლიაშვილს აკავებდა, ის ცუდად გახდა და ეს პოლიციელებს უთხრა. მისი თქმით, ყველა თვითმხილველი და თავად გარდაცვლილიც მოითხოვდა სასწრაფოს გამოძახებას. მეზობლები პოლიციის მხრიდან ძალის გადამეტებაზე საუბრობენ.
მომხდარიდან რამდენიმე საათში შსს-მ ვიდეომასალა გაავრცელა, სადაც გარდაცვლილის მეზობელი ნოდარ შანიძე ამბობდა, რომ გარდაცვლილი ფსიქოტროპულ მედიკამენტებს იღებდა.
შანიძე: პავლიაშვილის მიერ ფსიქოტროპულების მიღებაზე შეკითხვა შსს-ს წარმომადგენელმა დამისვა
ვიდეო ►თვითმხილველი: „იხვეწებოდა სასწრაფო გამოიძახეთო... წაქცეულზე უკეთებდნენ ბორკილს..."