აფეთქებები და სროლა საქართველოს დედაქალაქში. კონტრტერორისტული რაზმები მრავალსართულიან საცხოვრებელ კორპუსზე შტურმს ახორციელებენ,- „ალჯაზირა“ ბერი გაბრიელ სალოსის ქუჩაზე მიმდინარე სპეცოპერაციის შესახებ ინფორმაციას ავრცელებს.
„ალჯაზირა“ ნინო გიორგობიანის განცხადებას ავრცელებს, სადაც სუს-ის პრესსამსახურის უფროსი სპეცოპერაციის დეტალებზე საუბრობს.
„წინასწარი ინფორმაციით, ისინი საქართველოს მოქალაქეები არ არიან და ტერორისტული დაჯგუფების წევრები არიან. მნიშვნელოვანია, რომ საქართველოს კონტრტერორისტული დეპარტამენტი რამდენიმე საათის განმავლობაში ცდილობდა მათთან მოლაპარაკებას, მაგრამ უშედეგოდ“,- ციტირებს „ალჯაზირა“ გიორგობიანის განცხადებას.
„ალჯაზირა“ წერს, რომ სპეცოპერაციის გამო, დღეს მთავრობამ საგანგებო შეხვედრა გამართა, თუმცა მიმდინარე პროცესზე საჯარო განცხადებები არ გაკეთებულა.
მედიასაშუალება ნიკა რურუას განცხადებას ავრცელებს, სადაც „ნაციონალური მოძრაობის“ წევრი სპეცოპერაციის მიმდინარეობას აკრიტიკებს.
„ქვეყანაში უსაფრთხოების სერიოზული პრობლემაა, პირველ რიგში დაზვერვის თვალსაზრისით. ეს ადამიანები ამ ბინაში 2 წელზე დიდხანს იმყოფებოდნენ და დიდი რაოდენობით იარაღი ჰქონდათ შიგნით“,- ამბობს რურუა.
