კონტრტერორისტული ოპერაციის მიმდინარეობისას გაჩენილ ხანძარს მეხანძრეები აქრობენ - ამის შესახებ „ლიბერალს“ საგანგებო სიტუაციების სამსახურში განუცხადეს. 

„ლიბერალის“ კორესპონდენტის გადაღებულ კარებში ჩანს, რომ კორპუსი იწვის და ძლიერი დაკვამლიანებაა. 

სპეცოპერაცია გუშინ გვიან ღამით დაიწყო. ისმოდა სროლის და აფეთქების ხმა. კორპუსიდან, სადაც ოპერაცია ტარდება, მოსახლეობა გაიყვანეს. კორპუსთან მობილიზებულია სპეცრაზმის დამატებითი ძალები და სასწრაფო სამედიცინო დახმარების რამდენიმე ბრიგადა. 

სპეცოპერაციის შედეგად დაიჭრა ერთი სპეცრაზმელი, რომლის მდგომარეობაც მძიმეა. 

სახელმწიფო უსაფრთხოების სამსახურის ინფორმაციით, კონტრტერორისტული დეპარტამენტის წარმომადგენლებმა თბილისში, ბერი გაბრიელ სალოსის გამზირზე სპეცოპერაციის შედეგად, დააკავეს ერთი პირი, ხოლო დანარჩენების დასაკავებლად მიმდინარეობს სპეციალური ოპერაცია. 

სუს-ის ინფორმაციით, აღნიშნული პირები არ არიან საქართველოს მოქალაქეები და არიან ტერორისტული ორგანიზაციის წევრები.