სახელმწიფო უსაფრთხოების სამსახურის უფროსის, ვახტანგ გომელაურის თქმით, იყო საფრთხე, რომ დანაშაულებრივი ჯგუფის წევრებს მძევლად აეყვანათ მოსახლეობა.
„კითხვები იყო, რატომ გაგრძელდა ამდენ საათს სპეცოპერაცია - ზუსტად იმიტომ, რომ არ დაშავებულიყვნენ მოქალაქეები და ჩვენი ძალოვანი სტრუქტურის თანამშრომლები, პოლიციელები, სახელმწიფო უსაფრთხოების სამსახურის თანამშრომლები, აქედან გამომდინარე, იყო ეს ყველაფერი, რომ ნაკლები დანაკარგი ყოფილიყო", - განაცხადა გომელაურმა.
გაბრიელ სალოსის ქუჩაზე კონტრტერორისტული სპეცოპერაცია გუშინ გვიან ღამით დაიწყო და რამდენიმე საათის წინ დასრულდა. სუსის ინფორმაციით, სპეცოპერაციის სამიზნე ტერორისტული დაჯგუფების წევრები იყვნენ. ბერი გაბრიელ სალოსის ქუჩაზე მიმდინარე სპეცოპერაციისას 41 წლის სპეცრაზმელი დაიღუპა, 4 სამართალდამცველი კი დაიჭრა.
სუსის ინფორმაციით, კონტრტერორისტული სპეცოპერაციის შედეგად დაკავებულია დანაშაულებრივი დაჯგუფების 1 წევრი და ლიკვიდირებულია 3.
