სახელმწიფო უსაფრთხოების სამსახურის ხელმძღვანელმა, ვახტანგ გომელაურმა რეფერალურ საავადმყოფოსთან  სპეცოპერაციის შესახებ ისაუბრა. მისი თქმით, თავისუფლად შეიძლება ითქვას, რომ დანაშაულებრივი დაჯგუფების წევრებმა საქართველოში ტერორისტული აქტი ჩაიდინეს.

ვახტანგ გომელაურმა რეფერალურ საავადმყოფოში დაჭრილი სპეცრაზმელები და შინაგან საქმეთა სამინისტროს დაჭრილი თანამშრომლები მოინახულა. 

„თუ შევხედავთ იმას, დღევანდელ დღეს რაც მოხდა, თავისუფლად შეგვიძლია ვთქვათ, რომ მათ ტერორისტული აქტი ჩაიდინეს საქართველოში. 18-საათიან ბრძოლას აწარმოებენ ძალოვან სტრუქტურებთან, "- ამბობს ვახტანგ გომელაური. 

მისივე თქმით, ყველა ზარს თუ მუქარას, რომელიც კი გავრცელდა, სერიოზულად შეისწავლიან.  გომელაურმა ასევე აღნიშნა, რომ არასწორია გავრცელებული ინფორმაცია სამოქალაქო პირის გარდაცვალებასთან დაკავშირებით.

კონტრტერორისტული სპეცოპერაცია, რომელიც 20 საათზე მეტხანს გრძელდებოდა, დასრულდა. სუსის ინფორმაციით, დაკავებულია დანაშაულებრივი დაჯგუფების ერთი წევრი, ლიკვიდირებულია სამი. 

სპეცოპერაციის შედეგად დაიღუპა ერთი სპეცრაზმელი და დაიჭრა ორი. ასევე, დაიჭრა შინაგან საქმეთა სამინისტროს ორი თანამშრომელი.