რობინიოს იტალიის სასამართლომ ჯგუფურ გაუპატიურებაში მონაწილეობისთვის 9 წელი დაუსწრებლად მიუსაჯა. 33 წლის ფეხბურთელს, რომელიც „მადრიდის რეალის“, „მანჩესტერ სიტის“ და „მილანის“ ყოფილი მოთამაშეა, 5 სხვა პირთან ერთად 22 წლის ალბანელი გოგოს გაუპატიურებაში სდებენ ბრალს.
რობინიო, რომელიც ამჟამად ბრაზილიაში კლუბ „ატლეტიკო მინეიროში“ თამაშობს, იტალიაში არ ჩასულა. სასამართლოში მისმა ადვოკატმა განაცხადა, რომ ფეხბურთელი ბრალს არ აღიარებს. ინსტაგრამზე რობინიოს ოფიციალურ გვერდზე გავრცელებულ განცხადებაში კი წერია, რომ „ფეხბურთელმა ბრალდებებისგან საკუთარი თავი უკვე დაიცვა. ამტკიცებდა, რომ იმ ეპიზოდში რობინიოს მონაწილეობა არ მიუღია“.
ფეხბურთელს სასამართლოს ამ ინსტანციის გადაწყვეტილების გასაჩივრება შეუძლია და განაჩენის აღსრულება მხოლოდ საბოლოო გადაწყვეტილების შემდეგ იქნება შესაძლებელი.
რობინიომ კარიერა ბრაზილიის გუნდ „სანსტოსში“ დაიწყო, შემდეგ 4 წლის განმავლობაში თამაშობდა „მადრიდის რეალში“, ესპანეთიდან ფეხბურთელი ინგლისში გადავიდა. „მანჩესტერ სიტის“ შეიხ მანსურის მფლობელობაში გადასვლის შემდეგ ის იყო კლუბის პირველი გახმაურებული ტრანსფერი. 2008 წლის ზაფხულში რობინიო „მანჩესტერ სიტიმ“ ინგლისისთვის იმ დროისთვის რეკორდულ ფასად, 32.5 მილიონ გირვანქად შეიძინა. რობინიომ ინგლისის შემდეგ კარიერა იტალიურ „მილანში“ განაგრძო, შემდეგ თამაშობდა ჩინეთშიც, ამჟამად კი ბრაზილიაში, „ატლეტიკო მინეიროს“ ფეხბურთელია.