თბილისში ანტიტერორისტული სპეცოპერაციის შედეგად დაღუპული სპეცრაზმელის, ვანო გოლოშვილის ოჯახს ბიზნესმენმა ლეონიდ ჩერნოვეცკიმ 25 ათასი ლარი გადასცა.
„საქართველომ დაკარგა თავისი გმირი თბილისში ჩატარებული ანტიტერორისტული ოპერაციის დროს! ის არა მხოლოდ ტერორისტებს ებრძოდა, არამედ იცავდა სამშობლოს, ხალხსა და შვილებს!
ვანოს მალე დაბადების დღე უნდა აღენიშნა, ის 42 წლის გახდებოდა. ამ დღის გატარებას მეუღლისა და ორი შვილის გარემოცვაში გეგმავდა...
მე, როგორც ნებისმიერი ადამიანი, რომელიც ამაყ და დამოუკიდებელ საქართველოში ცხოვრობს, მისი ოჯახის წინაშე ვალში ვარ და ჩვენ უნდა გავაკეთოთ ყველაფერი რაც შესაძლებელია, იმისთვის, რომ მათ იგრძნონ, რომ მარტონი არ დარჩნენ ამ უბედურებასთან, რომელსაც მამის, მეუღლისა და მარჩენალის დაკარგვა ჰქვია!
დარწმუნებული ვარ, რომ ის თანხა, რომელიც მის მეუღლეს გადავეცით (25 ათასი ლარი), სრულიად არაა საკმარისი იმისთვის, რომ ეს ტკივილიანი დანაკლისი რამენაირად შეავსოს, მაგრამ ასეთ მომენტებში ერთად უნდა დავდგეთ. ეს ხომ ჩვენი დიდი საერთო ოჯახის - ქართველი ხალხის უდიდესი დანაკლისია!
დიდება გმირებს!
დიდება საქართველოს!“ - აცხადებს ლეონიდ ჩერნოვეცკი.
