ხორავას ქუჩაზე დაჭრილი ორი ბავშვიდან ერთი გარდაიცვალა. ამის შესახებ ინფორმაციას შსს ავრცელებს. შსს-ს ინფორმაციით, დაჭრილი საავადმყოფოში მიყვანამდე გარდაიცვალა. გარდაცვლილი მოსწავლე 51-ე სკოლის მოსწავლე იყო. როგორც „ლიბერალს“ თვითმხილველებმა უთხრეს, მსუბუქად დაზიანდა მესამე მოსწავლეც. 

„შინაგან საქმეთა სამინისტროს გადაუდებელი დახმარების ოპერატიული მართვის ცენტრ „112“-ში მიმდინარე წლის 1 დეკემბერს, 14:10 საათზე შევიდა შეტყობინება, რომ თბილისში, ხორავას ქუჩაზე, არასრულწლოვნებს შორის ჩხუბი მოხდა.

მიღებულ შეტყობინებაზე პოლიციამ მყისიერი რეაგირება მოახდინა. შემთხვევის ადგილზე სამართალდამცველები და სასწრაფო სამედიცინო დახმარების ბრიგადა ოპერატიულად მივიდნენ. 

წინასწარი ინფორმაციით, ურთიერთშელაპარაკებისას, ცივი იარაღით დაჭრეს 2001 წელს დაბადებული დ.ს., რომელიც საავადმყოფოშია გადაყვანილი და 2001 წელს დაბადებული ლ.დ., რომელიც მიყენებული ჭრილობის შედეგად, საავადმყოფოში მიყვანამდე, გზაში გარდაიცვალა.

პოლიციამ უკვე ამოიღო როგორც 51-ე საჯარო სკოლაში დამონტაჟებული, ასევე, მის მიმდებარე ტერიტორიაზე არსებული სათვალთვალო ვიდეოკამერების ჩანაწერები, რომელთა შესწავლაც მიმდინარეობს.

მომხდარ ფაქტთან დაკავშირებით გამოძიება თბილისის პოლიციის დეპარტამენტმა საქართველოს სსკ-ს 108-ე მუხლით (განზრახ მკვლელობა) დაიწყო. შემთხვევის ადგილზე მიმდინარეობს საგამოძიებო მოქმედებები“,-ნათქვამია შსს-ს მიერ გავრცელებულ განცხადებაში. 

როგორც „ლიბერალს" თვითმხილველმა უთხრა, დაჭრას წინ შელაპარაკება უძღოდა, რომელიც 51-ე საჯარო სკოლასთან დაიწყო. შემდეგ ხორავას ქუჩაზე გადაინაცვლეს და ერთმანეთს ფიზიკურად დაუპირისპირდნენ.  დაპირისპირება მე-11 კლასელებს შორის მოხდა.