გენერალურ პროკურატურაში მიხეილ სააკაშვილი თბილისის დროით 11 საათზე დასაკითხად დაიბარეს. თუმცა, საქართველოს ყოფილი პრეზიდენტის თქმით, ის პროკურატურაში მისვლას არ აპირებს. იმ შემთხვევაში, თუ „ახალი ძალების მოძრაობის“ ლიდერი დაკითხვაზე თავად არ გამოცხადდება, მაშინ სამართალდამცველები მის აყვანას ხელახლა შეეცდებიან.
„უკრაინსკაია პრავდას“ ინფორმაციით, წუხელ, უკრაინის გენერალურმა პროკურორმა იური ლუცენკომ მიხეილ სააკაშვილი ძებნილად გამოაცხადა, მაშინ, როცა ის რადის წინ საპროტესტო აქციას მართავდა.
დილით, თბილისის დროით 8 საათზე, სამართალდამცველებმა რადის წინ სააკაშვილის მიერ მოწყობილ კარვების ქალაქზე შტურმი სცადეს. შეტაკებისას დაშავდა რამდენიმე აქტივისტი, თუმცა პოლიციამ საქართველოს ექსპრეზიდენტის დაკავება ვერ მოახერხა. აქციის მონაწილეებმა ბარიკადების მოწყობა დაიწყეს რადას წინ, სააკაშვილი კი მოქალაქეებმა სასტუმრო „კიევში“ გადაიყვანეს.
