რუსთაველის მეტროსთან „ნაციონალური მოძრაობის“ აქცია „ღირსების მანიფესტაცია“ მიმდინარეობს. პარტიის წევრები და აქციის მონაწილეები საქართველოს ყოფილ პრეზიდენტს, მიხეილ სააკაშვილს მხარდასაჭერას უცხადებენ და კიევში მიმდინარე პროცესებს აპროტესტებენ.

„ჩვენი მთავარი ამოცანა არის მაქსიმალური მობილიზაცია, როგორც ჩვენი ამომრჩევლის, ასევე დემოკრატიულად და პატრიოტულად განწყობილი საზოგადოების, იმისათვის, რომ ძალიან აქტიური, საჯარო პროტესტი, დავანახოთ ხელისუფლებას. ტერორისტებთან მეგობრობა, დამნაშავეთა სამყაროსთან მეგობრობა, პუტინის ხელისუფლებასთან მეგობრობა, ვერ იქნება ის გზავნილი, რომელსაც ქართველი ხალხი მხარს დაუჭერს“,- განაცხადა „ნაციონალური მოძრაობის“ წევრმა ნუგზარ წიკლაურმა.

როგორც დღევანდელ აქციასთან დაკავშირებით პარტიის ერთ-ერთმა ლიდერმა, ნიკა მელიამ განაცხადა, ეს იქნება გადამწყვეტი ბრძოლა. მისი შეფასებით, მიხეილ სააკაშვილის დაპატიმრება ივანიშვილისა და პოროშენკოს ოლიგარქიული რეჟიმების  შეთანხმებული რევანშია თავისუფლებისთვის მებრძოლი ქართველი და უკრაინელი ხალხების წინააღმდეგ.  მელიას თქმით, „ერთიანი ნაციონალური მოძრაობა" გადადის  მოქმედების საგანგებო რეჟიმზე.

მიხეილ სააკაშვილის დაკავება პირველად 5 დეკემბერს სცადეს, მას უკრაინის პოლიცია ბრალად უყენებს იანუკოვიჩთან დაახლოებული და ძებნილი ოლიგარქის სერგეი კურჩენკოსგან დანაშაულებრივი ჯგუფის ინტერესების დაცვის სანაცვლოდ ნახევარ მილიონ დოლარამდე თანხის აღებას. ეს ფული კი, უკრაინის გენერალური პროკურორის, იური ლუცენკოს თქმით, ქვეყნის კანონიერი ხელისუფლების დამხობისთვის უნდა დახარჯულიყო.

სააკაშვილი საკუთარ სახლში 5 დეკემბერს დააკავეს, თუმცა სანამ მას ტერიტორიიდან გაიყვანდნენ ოდესის ყოფილი გუბერნატორის მხარდამჭერები შეიკრიბნენ და სამართალდამცველებისგან გამოიხსნეს. ამის შემდეგ მიხეილ სააკაშვილმა მომხრეებთან ერთად რადის წინ გადაინაცვლა და საპროტესტო აქცია დაიწყო. მათ წუხანდელი ღამე კარვებში გაატარეს.