„კოალიცია მედიის ადვოკატირებისთვის“ უკრაინაში ქართველი ჟურნალისტების არშეშვების ფაქტს ეხმაურება. „ლიბერალი“ განცხადებას უცვლელად გთავაზობთ:
„კოალიცია მედიის ადვოკატირებისთვის“ მოუწოდებს საქართველოს ხელისუფლებას, საგარეო საქმეთა სამინისტროს, მოახდინონ სწრაფი და ეფექტიანი რეაგირება უკრაინაში საქართველოს საზოგადოებრივი მაუწყებლის, ტელეკომპანია „პირველისა” და „რუსთავი 2-ის“ გადამღები ჯგუფების არშეშვების გამო, რომ ჟურნალისტებს მიეცეს თავისუფლად მუშაობის საშუალება.
მედიაში გავრცელებული ინფორმაციით, 5 დეკემბერს, „რუსთავი 2-სა" და „TV პირველის" გადამღები ჯგუფები უკრაინის საზღვარზე არ შეუშვეს. ისინი კიევში საქართველოს ყოფილ პრეზიდენტ მიხეილ სააკაშვილთან დაკავშირენული მოვლენების გასაშუქებლად მიემგზავრებოდნენ. საზოგადოებრივი მაუწყებლის ინფორმაციით, 6 დეკემბერს კიევში არ შეუშვეს მათი გადამღები ჯგუფიც.
კოალიცია მიიჩნევს, რომ მნიშვნელოვანია პარტნიორი ქვეყნის ხელისუფლება პასუხისგმებლობით ეკიდებოდეს საზოგადოების ინტერესს - მიიღონ ინფორმაცია უშუალოდ მოვლენათა ეპიცენტრიდან და დაუშვებელია ამ მიზნის მიღწევაში რომელიმე მედიასაშუალებას მუშაობა შეეზღუდოს“,- ნათქვამია განცხადებაში.
