საგარეო საქმეთა სამინისტრო ტრამპის მიერ იერუსალიმის ისრაელის დედაქალაქად აღიარებას ეხმაურება.
"ჩვენ ყურადღებით გავეცანით საქართველოს სტრატეგიული პარტნიორის, აშშ-ის პრეზიდენტის განცხადებას იერუსალიმის თაობაზე. ასევე ინფორმაციას, რომ ამჟამად მიმდინარეობს აღნიშნული საკითხის ფართო საერთაშორისო განხილვა, მათ შორის გაეროშიც.
საქართველო მხარს უჭერს საერთაშორისო თანამეგობრობის ძალისხმევას, რათა ისრაელ-პალესტინის კონფლიქტის მოგვარება მოხდეს მშვიდობიანად, დიალოგით მიღწეული შეთანხმების საფუძველზე.
ამის გათვალისწინებით, ჩვენ ვაკვირდებით მოვლენების შემდგომ განვითარებას და გავაგრძელებთ კონსულტაციებს პარტნიორებთან". – ვკითხულობთ საქართველოს საგარეო საქმეთა სამინისტროს განცხადებაში.
შეგახსენებთ, რომ ამერიკის პრეზიდენტმა, დონალდ ტრამპმა იერუსალიმი ისრაელის დედაქალაქად აღიარა და სახელმწიფო დეპარტამენტს დაავალა დაიწყოს მზადება შეერთებული შტატების საელჩოს თელავივიდან იერუსალიმში გადასატანად.
„იერუსალიმი არის მსოფლიოს სამი უდიდესი რელიგიის ცენტრი, ის ასევე არის მსოფლიოს ერთ-ერთი ყველაზე წარმატებული დემოკრატიის ცენტრი,“ - აღნიშნა პრეზიდენტმა ტრამპმა. „ბოლო 70 წლის განმავლობაში ისრაელელებმა ქვეყანა ააშენეს, სადაც ებრაელები, მუსლიმები, ქრისტიანები და ყველა სხვა აღმსარებლობის ადამიანები ცხოვრობენ და აგრძელებენ ღვთისმსახურებას,“ - დასძინა მან.
ტრამპის თქმით, „ამერიკა გააგრძელებს დაუღალავ მუშაობას სამშვიდობო შეთანხმების მისაღწევად, რომელიც ორივე მხარისთვის - როგორც ისრაელის, ასევე პალესტინისთვის - მისაღები იქნება. მე ყველაფერს გავაკეთებ იმისთვის, რომ ამ შეთანხმებას მივაღწიოთ.“
არაბული და სხვა მუსლიმური სახელმწიფოები აცხადებენ, რომ ამ სადავო გადაწყვეტილებამ, შესაძლოა, რეგიონში არსებული ისედაც რთული მდგომარეობა კიდევ უფრო დაამძიმოს.
პალესტინელებმა „მრისხანების სამი დღე“ გამოაცხადეს პრეზიდენტ ტრამპის გადაწყვეტილების გასაპროტესტებლად.
გადაწყვეტილებას არაერთი გამოხმაურება მოჰყვა. რომის პაპმა ფრანცისკემ „უკიდურესი შეშფოთება“ გამოხატა ამ გადაწყვეტილებასთან დაკავშირებით. თურქეთმა კი „ისლამური თანამშომლობის ორგანიზაციის“ წევრთა შეკრება მოითხოვა საპასუხო ქმედების დასაგეგმად. ბრიტანეთის საგარეო საქმეთა მდივანმა თქვა, რომ მისი ქვეყანა თელავივიდან საელჩოს გადატანას არ აპირებს.