„თეთრი ხმაურის მოძრაობა“, ქალთა საერთაშორისო ორგანიზაცია „აკესო“ და „ლიბერალი“ დღეს ნარკოპოლიტიკის შესახებ მომზადებული ვიდეოების პრეზენტაციას მართავს.
საჯარო ჩვენება დღეს, საღამოს 7 საათზე Frontline Georgia-ში გაიმართება.
„საჯარო ჩვენებაზე ნახავთ „თეთრი ხმაურის მოძრაობისა“ და „ლიბერალის“ მიერ ერთობლივად მომზადებულ დოკუმენტურ ვიდეოს - „სანამ ხალხთან ომი დასრულდება“. ვიდეო ნარკომომხმარებლების მიმართ „ნულოვანი ტოლერანტობის“ პოლიტიკის შედეგებს წარმოაჩენს. მასში ნაჩვენებია, შეიცვალა თუ არა ეს მიდგომა „ქართული ოცნების“ ხელისუფლების პერიოდში. რეპრესიული ნარკოპოლიტიკის მსხვერპლი ადამიანები თავიანთ ისტორიებს გვიზიარებენ, დარგის ექსპერტები კი იმ პოლიტიკის შედეგებს აფასებენ, რომელიც ქვეყანაში უკვე 10 წელზე მეტია გრძელდება. იურისტები ნარკოდანაშაულთან დაკავშირებით ძალოვანი უწყებების მიდგომასა და პრაქტიკაზე იმსჯელებენ.
ღონისძიების მეორე ნაწილი დაეთმობათ ნარკომომხმარებელ ქალებს, რომლებიც საქართველოში ერთ-ერთ ყველაზე მარგინალიზებულ ჯგუფს წარმოადგენენ. „აკესოს“ მიერ მომზადებულ ვიდეოში ნარკომომხმარებელი ქალები ჰყვებიან იმ სტიგმის შესახებ, რომელთან ერთად ცხოვრებაც ყოველდღიურად უწევთ. ჰყვებიან, შიშზე, რომელშიც საზოგადოების დამოკიდებულების გამო ცხოვრობენ. ამის გამო, ისინი საზოგადოებას ემალებიან. ღონიძისძიებაზე ნარკომომხმარებელი ქალების უფლებრივი მდგომარეობის შესახებ ანგარიშის მიმოხილვა, ჩვენების შემდეგ დისკუსია გაიმართება", - აცხადებენ ორგანიზატორები.