ევროპარლამენტი ახალ რეგულაციაზე მსჯელობს. დეკემბრის ბოლოს, ევროკავშირის ქვეყნებში შესაძლოა, აიკრძალოს ფოსფატის გამოყენება, რაც აუცილებელია შაურმის ხორცისთვის, რომ მან ფორმა და სურნელი არ დაკარგოს ვერტიკალური შეწვის დროსაც კი. შაურმის ინდუსტრიას, სადაც ევროკავშირის მასშტაბით 200 000-ზე მეტი ადამიანი მუშაობს, ეს დიდ საფრთხეს უქმნის. დიდ ბრიტანეთში ყოველდღიურად 1.3 მილიონი ერთეული შაურმა იყიდება, ის ყველაზე პოპულარული „ფასთ ფუდია“ გერმანიაშიც, სადაც ახალ შესაძლო რეგულაციას დიდი უკმაყოფილება მოჰყვა.
„თუ ევროპარლამენტი ახალ რეგულაციას მიიღებს, ის მთელი დონერ ინდუსტრიისთვის სასიკვდილო განაჩენი იქნება“, - თქვა გერმანიაში დონერ-შაურმის მწარმოებელთა ასოციაციის წარმომადგენელმა, ქენან ქოიუნჩუმ.
რეგულაციის წინააღმდეგია ევროპარლამენტარი, რენატ სომერი, რომელიც კანცლერ ანგელა მერკელის გუნდის წევრია. „ფოსფატის აკრძლავა შაურმის პროდუქციისთვის დასასრული იქნება. ეს კი ათასობით სამუშაო ადგილის დაკარგვას ნიშნავს“, - თქვა სომერმა.
ევროპარლამენტის ჯანდაცვის კომიტეტმა არ მიიღო ევროკომისიის წინადადება, რომ ფოსფორის მჟავის, ფოსფატებისა და პოლიფოსფატების გამოყენება დაეშვათ ძროხის, ხბოს, ცხვრისა და ფრინველის ხორცის წარმოებაში. ევროპარლამენტი დეკემბერში კიდევ ერთხელ განიხილავს ამ საკითხს და თუ კომისიის წინადადებას კიდევ ერთხელ უარყოფენ, მაშინ შაურმის წარმოება დიდი რისკის ქვეშ დადგება.