დროა დაიწყოს სერიოზული მსჯელობა ნარკოპოლიტიკის რეფორმასთან დაკავშირებით, - ამის შესახებ სახალხო დამცველმა ნინო ლომჯარიამ ჟურნალისტებს ”თეთრი ხმაურის მოძრაობის” დღევანდელ აქციასთან დაკავშირებით განუცხადა.
"ქვეყანაში ნარკომომხმარებელი და ნარკოდამოკიდებული პირების ძალიან მაღალი რაოდენობაა. ეს არის ნამდვილად ძალიან სერიოზული პრობლემა ქვეყნისთვის. თუმცა, მიუხედავად იმისა, რომ წლების განმავლობაში იყო ძალიან მკაცრი სისხლის სამართლის პოლიტიკა ამ მიმართულებით, მე ვფიქრობ და კვლევებიც და ფაქტებიც ცხადყოფს, რომ ამ მიდგომამ მთავარი შედეგი ვერ გამოიღო. კვლევები აჩვენებს, რომ იზრდება ნარკოდამოკიდებულების და ნარკომომხმარებლების რაოდენობა. ამიტომ, დღეს დროა დაიწყოს სერიოზული მსჯელობა ნარკოპოლიტიკის რეფორმასთან დაკავშირებით. სახელმწიფოს მიდგომა არ უნდა იყოს მხოლოდ რეპრესიული და აუცილებელია, აქცენტი გაკეთდეს განათლებაზე, პრევენციაზე, კონსულტაციაზე, დახმარებაზე და ნარკოდამოკიდებული პირების რეაბილიტაციაზე. მომხმარებლის კრიმინალიზაცია საბოლოო ჯამში ვერ გვაძლევს ნარკოდამოკიდებული პირების რაოდენობის შემცირებას. პირიქით, ეს ადამიანები კიდევ უფრო მეტად იჩაგრებიან, ხშირ შემთხვევაში სოციალურად დაუცველები ხდებიან. დღეს არის ნამდვილად დრო, რომ სახელმწიფომ გადახედოს თავის პოლიტიკას ნარკოდამოკიდებული პირების შემცირების საქმეში", - განაცხადა ლომჯარიამ.
„გამოდი გარეთ ახალი ნარკოპოლიტიკისთვის", - „თეთრი ხმაურის მოძრაობა" დღეს, 10 დეკემბერს, 5 საათზე ვარდების მოედანზე აქციას მართავს. „გადამწყვეტი ბრძოლა გამარჯვებისთვის", - მოძრაობაში ამბობენ, რომ ნარკოპოლიტიკის ცვლილებისთვის კანონპროექტის უცვლელად მიღება ხელისუფლების ვალდებულებაა.