„ხმაური გამარჯვებისთვის“ - ნარკოპოლიტიკის ცვლილებისთვის ვარდების მოედანზე აქცია მიმდინარეობს.
აქციის მოთხოვნებია, რომ ქვეყანაში არსებული რეპრესიული ნარკოპოლიტიკა, ზრუნვაზე ორიენტირებული გახდეს, დასრულდეს ნარკომომხმარებელთა მიმართ ძალადობრივი, სადამსჯელო მიდგომები და პოლიტიკა დაეფუძნოს ადამიანთა ჯანმრთელობაზე, ზიანის შემცირებასა და პრევენციაზე ზრუნვას.
პარლამენტში ინიცირებული კანონპროექტი ყველა სახის ნარკოტიკის მოხმარების და მცირე ოდენობით ფლობის დეკრიმინალიზებას, ასევე სამკურნალო-სარეაბილიტავიო, ზიანის შემცირებისა და პრეცენციის განვითარებას ითვალისწინებს.
„ჩვენ არ დავუშვებთ ფასადურ ცვლილებებს, კანონპროექტის უცვლელად მიღება არა ხელისუფალის კეთილი ნება, არამედ ვალდებულებაა“, - აცხადებენ ორგანიზატორები.
„ათასობით პატიმარი კანონპროექტის მოლოდინში“; „არ იქნება დეკრიმინალიზაცია, არ იქნება მშვიდობა“; „ამ კანონპროექტს ხალხი დაიცავს“,- წერია აქციის მონაწილეთა პლაკატებზე.
ნარკოპოლიტიკის ცვლილების მხარდამჭერი აქცია დღეს ქუთაისსა და ბათუმშიც იმართება.
