დაკავებულმა აზერბაიჯანელმა ჟურნალისტმა აფგან მუხთარლიმ „რუსთავი 2-თან“ მისი დაკავების დეტალებზე ისაუბრა. მისი თქმით, პოლიციის სამმა თანამშრომელმა ის ძალით ჩასვა მანქანაში. მუხთარლი ამბობს, რომ ისინი ქართულად საუბრობდნენ და კრიმინალური პოლიციის თანამშრომლები იყვნენ.
„პოლიციის სამმა თანამშრომელმა ძალით ჩამსვა მანქანაში, აეროპორტთან ახლოს, თავზე ტომარა ჩამომაცვეს და თვალები ამიხვიეს. ამის შემდეგ მეორე მანქანაში გადავჯექით, ერთი საათის შემდეგ კი მესამეში.
ამის შემდეგ მომხსნეს ტომარა და აღმოვაჩინე, რომ აზერბაიჯანში ვარ. გზაზე ჩემთან ერთად სამი ადამიანი იყო. ისინი კრიმინალური პოლიციის ფორმებით იყვნენ და ქართულად მესაუბრებოდნენ. წინააღმდეგობა სპეციალურად არ გავუწიე. მივხვდი, რომ კრიმინალური პოლიციიდან იყვნენ, შემეშინდა ჩემი დეპორტაცია არ მოეხდინათ და წყნარად ვიჯექი მანქანაში“,-განაცხადა მუხთარლიმ.
მისი თქმით, ეს არ არის პროცესი, ესაა სპექტაკლი, რაზეც საქართველოს პრემიერს პასუხის გაცემა მოუწევს. ის ამბობს, რომ კვირიკაშვილმა და შს მინისტრმა ერთად დაგეგმა და ჩაიდინა ეს დანაშაული.
„ეს სპექტაკლია. ჩემი მოტაცების დამკვეთები და შემსრულებლები არსებობენ. საინტერესოა, რომ იმ დღეს თბილისში არც ერთი კამერა არ მუშაობდა. საქართველოს პრემიერს მოკითხვა გადაეცით ჩემგან. მას ადრე თუ გვიან მოუწევს პასუხის გაცემა. კვირიკაშვილი და შინაგან საქმეთა მინისტრი, ყველამ ერთად დაგეგმა და სახელმწიფო დონეზე ჩაიდინა დანაშაული”, - განაცხადა აფგან მუხთარლიმ „რუსთავი 2-თან“.