საპარლამენტო უმრავლესობაში ორი ახალი ფრაქციის შექმნა იგეგმება - ამის შესახებ ჟურნალისტებს იურიდიულ საკითხთა კომიტეტის თავმჯდომარე ეკა ბესელიამ განუცხადა.
ბესელიას თქმით, ფრაქცია „ქართული ოცნება" ძალიან დიდია, ამიტომ პოლიტიკურ პროცესებში დეპუტატების მეტად ჩართვის თვალსაზრისით ორი ახალი ფრაქცია უფრო მოქნილად იმუშავებს.
„ეს შესაძლებლობას მისცემს, ისეთ დიდ ფრაქციას, როგორიც დღეს "ქართული ოცნებაა" მოხდეს, როგორც პოლიტიკურ პროცესებში დეპუტატებისთვის უფრო მეტი ჩართვის შესაძლებლობის შექმნა, ასევე მართვის თვალსაზრისით გაცილებით უფრო მოქნილი პოლიტიკური ინსტრუმენტების გამოყენება. ამიტომ მე მგონია, ეს არის დროული და კარგი გადაწყვეტილება. ძალიან რთულია ასეთი დიდი ფრაქციის ისე მართვა, რომ ყველას ჰქონდეს პოლიტიკურ პროცესში თანაბარი მონაწილეობის საშუალება" - ეკა ბესელიას კომენტარს IPN ავრცელებს.
მისი თქმით, მალე გახდება ცნობილი, თუ რომელი დეუტატები გადანაწილდებიან ახალ ფრაქციებში.