მეცნიერებათა აკადემიის ინიციატივით, მეცნიერები, ნარკოლოგები, სასულიერო პირები და საზოგადოების წარმომადგენლები ნარკოპოლიტიკის კანონპროექტის ინიციატორებს ხვდებიან.
შეხვედრაზე ერთ-ერთმა მეცნიერმა, იურიდიულ მეცნიერებათა დოქტორმა ჯემალ ჯანაშიამ ტერმინ „მარიხუანასთან“ დაკავშირებით ისაუბრა.
„მარიხუანა ეს არ არის სწორი ტერმინი. სწორი ტერმინია კანაბისი. მე მეცნიერებათა აკადემიაში ვარ და მარიხუანა ეს არის სლენგი... იყო მარია და ხუანი. ეს ორი ადამიანი გაერთიანდა, მოწიეს ეს შეკეთებული სიგარეტი და მერე გამოვიდა პაპიროსი - მარიხუანა. ამიტომ ჩვენ ამას უნდა შევეშვათ ნელ-ნელა და უნდა გადავიდეთ უფრო სწორ ტერმინოლოგიაზე", - თქვა შეხვედრაზე ჯემალ ჯანაშიამ.
მისი თქმით, როგორ შეიძლება ეს ტერმინი გამოიყენებოდეს საკონსტიტუციო სასამართლოს გადაწვეტილებაში.
„საკონსტიტუციო სასამართლოს გადაწყვეტილება, რომელმაც ქართული საკანონმდებლო არქიტექტურა მთლიანად დაარღვია, გამოიყენა ტერმინი „მარიხუანა“. როგორ შეიძლება ეს ტერმინი გამოიყენებოდეს საკონსტიტუციო სასამართლოს გადაწვეტილებაში, რომელმაც ერთი მეორეზე მიაწყო ისეთი გადაწყვეტილებები, რამაც შექმნა კოლიზია ქართულ კანონმდებლობაში“, - განაცხადა ჯემალ ჯანაშიამ.
ჯემალ ჯანაშია იურიდიულ მეცნიერებათა დოქტორი და გენერალ-მაიორია. იყო საქართველოს შსს სამმართველოს უფროსი (1993-1994) და საქართველოს სახელმწიფო უშიშროების სამინისტროს საერთაშორისო დანაშაულთან ბრძოლის დეპარტამენტის თავმჯდომარე 1997-1998 წლებში.
