მეცნიერებათა აკადემიის ინიციატივით, მეცნიერები, ნარკოლოგები, სასულიერო პირები და საზოგადოების წარმომადგენლები ნარკოპოლიტიკის კანონპროექტის ინიციატორებს შეხვდნენ.
შეხვედრაზე ჯანდაცვის კომიტეტის თავმჯდომარემ აკაკი ზოიძემ განაცხადა, რომ ნარკოპოლიტიკის შესახებ კანონპროექტის განხილვა პარლამენტში მას შემდეგ გაგრძელდება, რაც საპარლამენტო უმრავლესობა ამ საკითხზე შეჯერდება. ის ვარაუდობს, რომ განხილვა საგაზაფხულო სესიაზე მოესწრება.
"განხილვის შემდგომი ნაბიჯი არის იურიდიული კომიტეტი, შემდეგ პლენარული სხდომა. არ მოხდება ეს განხილვა ვიდრე უმრავლესობა არ შეჯერდება პოზიციაზე. ღრმად ვარ დარწმუნებული უმრავლესობა შეჯერდება კანონპროექტზე და შემდეგ განახლდება საკანონმდებლო განხილვა. შეჯერება მოხდება იმ პრინციპებოს გარშემო, რაც გამოითქვა დღესაც, გუშინაც, რომ ნარკოტიკების გასაღებასთან უნდა გაგრძელდეს დაუნდობელი ბრძოლა, პრევენცია უნდა იყოს ნარკოპოლიტიკის ქვაკუთხედი და მის მოხმარებაზე ადამიანებს უნდა დავეხმაროთ და არა დავიჭიროთ",- განაცხადა ზოიძემ.