ყოფილი მეუღლის მიერ დაჭრილი ქალი რეანიმაციიდან პალატაში გადაიყვანეს. როგორც „ლიბერალს“ პირველ საავადმყოფოში უთხრეს, მისი მდგომარეობა უმჯობესდება. შსს-ს ცნობით, 13 იანვარს ფ.ფ. და მის მეგობარი გ.დ. დროებით საცხოვრებელ სახლში ყოფილმა მეუღლემ ურთიერთშელაპარაკებისას დაჭრა. 1975 წელს დაბადებული ზ.მ. ისანი-სამგორის რაიონის პოლიციის თანამშრომლებმა ცხელ კვალზე აიყვანეს. პოლიციამ დანაშაულის ჩადენის იარაღი - დანა ნივთმტკიცებად ამოიღო. ბრალდებული დანაშაულს აღიარებს.

„რუსთავი 2-ის“ ინფორმაციით, 32 წლის ქალს ყოფილმა ქმარმა 14 ჭრილობა მიაყენა -  4 ნაკვეთი ჭრილობა საზარდულის არეში, 10 კი მუცელში. 2 მცირეწლოვანი შვილის დედა თავდაპირველად რეანიმაციულ განყოფილებაში მოათავსეს. მისი მდგომარეობა კრიტიკული იყო.

გამოძიება ოჯახის ერთი წევრის მიერ ოჯახის სხვა წევრის ჯანმრთელობის განზრახ მძიმე დაზიანების ფაქტზე საქართველოს სსკ-ს 11-პრიმა-117-ე მუხლით და 117-ე მუხლის პირველი ნაწილით მიმდინარეობს, რაც 3-დან 6 წლამდე ვადით თავისუფლების აღკვეთას ითვალისწინებს.