ეროვნულ-დემოკრატიულმა ინსტიტუტმა (NDI) და CRRC-საქართველომ მედიას 2017 წლის დეკემბერში ჩატარებული საზოგადოებრივი აზრის კვლევის შედეგების პირველი ნაწილი წარუდგინეს. კვლევის მიხედვით, გამოკითხულ მოქალაქეთა უმეტესობა ფიქრობს, რომ სამხედრო ძალით რუსეთი აშშ-ს აღემატება. კითხვაზე, „რომელი ქვეყანა უფრო ძლიერია სამხედრო ძალის თვალსაზრისით, რუსეთი თუ აშშ?“ მოქალაქეთა 41%-მა უპასუხა, რომ რუსეთი უფრო ძლიერია. 36% ფიქრობს, რომ ამერიკა აღემატება რუსეთს. გამოკითხულთა 15%-ის აზრით რუსეთსა და აშშ-ს თანაბარი სამხედრო ძალა აქვთ, 8%-მა კი შეკითხვას ვერ უპასუხა.
ამასთან, მოქალაქეთა უმეტესობა ეთანხმება აზრს, რომ საქართველოში არსებობს რუსული პროპაგანდა. გამოკითხულთა 53%-ის აზრით რუსული პროპაგანდა არსებობს, 30% ამ მოსაზრებას ეწინააღმდეგება, 17%-მა კი არ იცის.
გამოკითხულთა 45% ეთანხმება მოსაზრებას, რომ საქართველოში ევროკავშირიდან მომავალი პროპაგანდაა. მოქალაქეების 29% ამ მოსაზრებას არ ეთანხმება, გამოკითხულთა 26%-მა კი შეკითხვას ვერ უპასუხა. ევროკავშირთან დაახლოებული მონაცემებია საქართველოში აშშ-დან მომავალი პროპაგანდის არსებობაზე. გამოკითხულთა 44% საქართველოში აშშ-დან მომავალი პროპაგანდის არსებობას ეთანხმება, 28 კი არ ეთანხმება. ასევე მოქალაქეთა 28%-მა ამ შეკითხვას უპასუხა, რომ არ იცის, არის თუ არა ჩვენთან აშშ-დან მომავალი პროპაგანდა.
აღნიშნული გამოკითხვა 2017 წლის 29 ნოემბერი-19 დეკემბრის პერიოდში, საქართველოს
მასშტაბით 2,298 პირისპირ ინტერვიუს წარმომადგენლობითი შერჩევის საფუძველზე,
ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა
(ოკუპირებული ტერიტორიების გამოკლებით). კვლევაში საშუალო ცდომილების ზღვარი არის +/- 1.9 პროცენტი. NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით და ატარებს CRRC საქართველო.
